Sochiye aapke kisi apne ko emergency mein blood ki zarurat ho aur aap desperate ho kar online help dhoond rahe ho. Kisi website ya NGO ka number milta hai, aap contact karte ho, wo kehte hain – "Blood mil jayega, bas pehle thoda paisa bhejna hoga." Aap bhej dete ho... uske baad apko block kar diya jaye
Is article mein hum aise kuch real cases ke baare mein baat karenge jahan logon ne blood ke liye online madad maangi, lekin unhe mila sirf fraud. Saath hi jaanenge ki aise scams se kaise bacha jaaye.
Tamil Nadu Scam Case
Ek shocking case Tamil Nadu se samne aaya jahan patient ki maut tak ho gayi fraud ke chakkar mein.
R. Manikandan ne AB-positive blood ke liye online madad maangi. Ek aadmi ne contact kiya aur ₹1,000 advance maanga travel ke liye. Paise milte hi usne Manikandan ko block kar diya. Patient ki halat critical thi, aur kuch din baad unka death ho gaya. source
Yeh sirf financial scam nahi, emotional trauma bhi hai. Jab kisi ke liye har second important ho, tab aise log unka time aur paisa dono waste karte hain.
Telangana and Hyderabad Scam
COVID ke baad jab healthcare systems weak ho gaye aur log zyada vulnerable ho gaye, tab se kuch scammer ne rare blood groups (jaise B–, AB–, B+) ka bahana banakar logo ko target karna shuru kiya.
Hyderabad Fraud (December 2023)
Hyderabad mein kai logon ne rare blood group ke liye urgent donors dhundhna shuru kiya. Scammers ne Facebook, WhatsApp aur other social media platforms par blood request dekhkar direct contact kiya. Yeh fraudsters fake profiles banakar bolte the ki “humare pass donor hai, lekin travel ke liye kuch paise bhejne padenge.” Victims ne ₹1,600 se ₹5,000 tak paise UPI, PhonePe, Google Pay ke through bheje. Paise milne ke baad fraudster ne victim ko block kar diya – na donor aaya, na contact ho paaya.
Case 1 – Sakshi ka AB-Negative Blood Fraud (Karimnagar)
Sakshi ko AB-negative blood urgently chahiye tha apne relative ke liye. Ek aadmi ne contact kiya aur bola ki donor available hai, lekin travel ke ₹700 aur food ke ₹200 bhejne honge. Sakshi ne ₹900 bhej diye, lekin donor ne block kar diya. Donor na aaya, na kisi tarah contact ho paaya. Police ne bataya yeh ek purana scam hai. source
Case 2 – Dialysis Patient ki Family ka Scam
Ek family ko dialysis ke liye blood chahiye tha, unhone ₹1,500 udhaar liye. Unhone “donor” ko paise bheje, lekin usne block karke disappear kar diya. Blood time par nahi mila, aur patient ki condition aur bhi serious ho gayi.
Fraud Hone ki Wajah – Detail Mein Samajhiye
-
Social Media par Personal Details Share Karna
Emergency mein log turant Facebook, WhatsApp, Twitter (X), ya Instagram par help maangte hain. Wo apna phone number, patient ka naam, blood group, hospital details sab public kar dete hain.
Fraudsters isi public info ka misuse karte hain – woh aapko directly contact karte hain aur trust build karke paisa maang lete hain. -
Fake Donors WhatsApp and Telegram Groups Mein Active Rehte Hain
India mein hazaron blood request groups hain jahan log real help ke liye jude hote hain. Fraudsters in groups ka part ban jaate hain aur jab koi emergency post aati hai, woh turant reply karte hain jaise:
“Mere cousin ka AB– blood hai, main bhejta hoon. Sirf thoda travel charge bhejna padega.” -
Rare Blood Group ka Excuse Bana Kar Urgency Create Karna
Scammers aksar aise blood groups target karte hain jo market mein easily available nahi hote – jaise AB–, B–, O– etc.
“Yeh group rare hai, bahut mushkil se arrange kiya hai. Mere aadmi ko turant bhejna padega. Thoda travel amount bhej do.” -
Kisi Tarah ka Identity Proof na Dena
Genuine donors ya NGOs aapko apna ID, blood bank certificate, ya kisi authorized organization ka naam denge.
Fraudsters sirf phone call ya WhatsApp se baat karte hain, aur jab aap unse ID maangte hain toh ignore karte hain ya fake ID bhejte hain. -
Advance Payment Maangna – Red Flag!
Real blood donation kabhi bhi paisa le kar nahi hota. Agar koi pehle paisa maang raha hai – “Petrol bharwana hai,” “Bus pakadni hai,” “Khaana khilana hai” – toh samajh jaaiye yeh scam hai.
Koi bhi registered NGO ya hospital aapse pehle payment nahi lega.
Yeh sab red flags hain. Real blood banks ya NGOs kabhi advance paise nahi maangte. Alert rehna bahut zaroori hai.
Conclusion
Tamil Nadu se Telangana tak aise kai cases samne aaye hain jahan logon ne paise diye aur badle mein mila sirf dhokha. Inmein common pattern hota hai: rare blood group, travel charges ka excuse, aur block kar dena.
Agar aapko ya kisi aur ko blood ki zarurat ho, toh sirf verified blood banks ya genuine NGOs se hi contact karein. Kisi unknown person ko advance paisa na bhejein. Aur agar koi aapse fraud karta hai, turant Cyber Cell ya Police mein complaint file karein.
